امیر گِت جان
اول بسم الله گمِ اسم خدار
صلوات رسمِ محمّد صلی الله رِ
حسن باحسین هر دِ فاطمه بزا رِ
عجب نور پاک داشتِ وشون دِتارِ
آقام علی علی جان مولا علی جان
خدای قروون که آسمونِ بساتِ
اَنّه بلندی رِ بی ستون بساتِ
خدای قروون محمّد چَنِّ جوون بسات
قرآن ونه کلام زِوون بساتِ
آقام علی علی جان مولا علی جان
دریوی میون بدیمِ یک ستارَه
قنبر وِه جلو شاه مردون سوارِ
ای شاه مردون بَرِس مِ مدعارِ
بغل بزنم قبر امام رضا رِ
آقام علی علی جان مولا علی جان
سبزَه وِنِ که سبزَه کربلا وو
جَوون ونه که قاسمِ نو زما وو
شُوی عروسی وِ خون و وِ حنا وو
روز عروسی کفن و نه قبا وو
آقام علی علی جان مولا علی جان
آدم چی حاصل آدمی زاد چی حاصل
گور تنگ وتاریک وظلمات چی حاصل
زرِین قلما سینه دوا چی حاصل
بَمِردِ روز داد و بی داد چی حاصل
آقام علی علی جان مولا علی جان
امیر گتِ جان کهنه روات کورمه
قلم آب نوس خالی دوات کورمه
صد دل غم دارمِ یک دل شاد کورمه
بَمِردِ روز دادوبی دادو کورمه
آقام علی علی جان مولا علی جان
بلبل میچکا وِ تن اتا مثقالِ
وِ مثقال تن هزار فر و خیالِ
هر که عاشقی نکردِ مردارِ
صد سالِ دووشَ کج فلک حمالِ
آقام علی علی جان مولا علی جان
مِ جان، مرگِ دروعِ
اَجَل بیموعِ اِسا وقت دروعِ
وِبمردِ روزو مارِ وجور ولوعِ
دنیا رِ دل نَوِن دنیا بی چشم و روعِ
آقام علی علی جان مولا علی جان
اُ که پر بَوو سر شونه شه کلارِ
جوون که میرنه زار زنه شه خدارِ
خوایم بورِم ُ رو هاکنم شِه دینِ
امام برحق امیرالمؤمنینِ
دامن بَییرم حسین نازنینِ
بورِم زیارت امام هشتمین
آقام علی علی جان مولا علی جان
